أتخايلي واحد مسافر و راح يبات ليلة واحدة في أوتيل ! و هو جاي يرقد، شاف في البلافو ما عجباتوش الثريا أيا واش دار؟ ناض و خرج يشري واحدة خلاف باه يبدلها و زاد كي جاء يرقد معجبوش لون الحيط قعد يغلي و يخمم كيفاه يصبغو و غمّو الحال و بقى”زعفان و مهموم ! دركا هذا البنادم واش نقدروا نقولوا عليه؟ مهبول ولا ما عندوش عقل donc واش يعلمنا القرآن؟ القرآن في كل مرة يدينا لمشهد الناس يوم القيامة و هوما يسقسوا في بعضاهم شحال قعدتوا ؟ أيا يقولوا: قعدنا نهار ولا نص نهار و كأنهم نهار يشوفوا الصح ، يحسوا رواحهم ما قعدوا فالدنيا والو يا ربي قيس عشيوة و لا صبيحة alors أكبر حاجة يبنيها فيك القرآن ، هي هاد الفكرة ! ” الدنيا زايلة فانية وقتها عابر هي مجرد مرحلة برك كيما هذاك اللي بايت في أوتيل ليلتين رايح يخليه و يمشي مع أول moment في الآخرة البنادم راح يشوف الدنيا على حقيقتها يقول؛ ” جازت عليا نهار ولا نص نهار بالبزاف“ من كثرة ما هي رخيصة و ما تسواش ! صحا واش لازم نديرو؟بزاف صوالح في الدنيا هذي لازمنا ما نعلقوش قلبنا بيهم بزاف ، ما لازمش نعطوهم أكثر من حقهم في التفكير و الغم و الحزن و شوفي، هادي ماشي معناها الواحد يسمح في الدنيا ولا ما يسعاش باه ينجح فيها لالا، هي دعوة برك باش نحطوا كل حاجة في بلاصتها ! الدنيا وسيلة مهمة بالبزاف ، بصح ما لازمش تكون هي راس مالنا و لا أكبر همنا ” تسبّيحة وحدة برك ، خير من الدنيا و ما فيها صلاة خاشعة و مقبولة أهم من الدنيا و ما فيها “! لا ضير إنا إلى ربنا منقلبون، مالي و للدنيا و ما للدنيا و مالي و ما أنا إلا كراكب إستظل تحت شجرة ثم راح و تركها يعني واش عندي في الدنيا أنا فيها كيما واحد مسافر إستظل تحت شجرة ريح شوية و من بعد ناض و خلاها و راح ! ” فمن كان يريد حرث الآخرة نزد له في حرثه، و من كان يريد حرث الدنيا نؤته منها و ماله في الآخرة من نصيب و من يرد ثواب الدنيا نؤته منها و من يرد ثواب الآخرة نؤته منها