يا طفلة علاه راكي ضاغطة على روحك هكذا ورافدة هم الدنيا كامل فوق كتافك ! أصبري و أحتسبي ريّحي شوية وكبّي الما على قلبك و سلمي أمرك لله ربي سبحانه قال” إنا كل شيء خلقناه بقدر “ كوني متهنية باللي راكي في البلاصة المناسبة ليك، و حتى هاد الابتلاء اللي راكي تجوزي فيه راهو قيسك و جاي على مقاسك باش يقويك ! وكل حاجة صارية لينا راهي مكتوبة قبل مايتخلقو السماوات والأرض مكتوب وين رايحة تعيشي و مع من، و شكون اللي راح تحبيه و شكون اللي راح تفارقيه مكتوب وين تخدمي وقتاش كيفاه، حتى وين تروحي و وين تجي، كلش مسطر كل عفسة راهي مكتوبة، صغيرة و لا كبيرة بصح نتي برك ما تتقلقيش ماتزربي على حتى حاجة و ما تندمي على حتى حاجة ، ما دام راكي دايرة اللي عليك و تجتهدي و راكي شادة في ”الأسباب“ ! أرضاي بالنتائج كيما جات، خاطرش المكتوب ماشي بيدي ولا بيدك، أنتي عليك تسعاي و تكافحي برك و ربك كريم ما ينسى حد ꜝ