رايحين غدوة للبحر في كار .. حنا و بيت عمي و عمي لوخر .. و ولادهم و ولاد ولادهم .. المهم جيش و صايي .. عشوة كاملة و حنا نوجدو .. حتى مالكسرة طيبوها .. ڤبيلة حنا ڤاعدين و بابا دخل علينا بڤاجو مخلط طماطم و بصل و فلفل .. حطو في لرض .. و بدا يصرفڤ بيدو .. أيا أيا شكشكو لينا الحالة .. الواحد ماذابيه يعوم خفيف .. ديرولنا شكشوكة تع ناس زمان وعمرو هالنا في بايط .. ڤَتلو بنت عمي إياه والله علكيف اذاكة ما لاها .. و نسمع في صوت أوخر جاي من هيه .. آاااواه غدوة سخانة تع كسكسي باللبن لا شكشوكة لا والو .. و هلال ولد عمي مادي شورط دجين يتحكم بالسبتة باه يعوم فيه .. و ڤاعد كان يونتريني على الدربوكة .. مرت عمي مسكينة متربعة تخيط في عشرة دراوات في بعضاهم باه نديرو بيهم ڤيطون في الشط .. نشاله يا نموتو نحنا يا مول الكار قبل ما يطلع النهار .. لا يزيدو يحكمونا الدرك الوطني يسَوطونا ڤدام الناس ..