ماشي لازم الناس كامل يعجبهم حالك.. الأهم انت تعجب روحك. متقللش من قيمتك على جال حد، متحبسش حلمك على جال حد.

عيش حياتك على قد قلبك النظيف.. وربي ديما مع اللي نيتو صافية

#حب_ذات #قوة_نفس #خليك_قوي
#dz #alg# VIP #chaabihob

كي تبدا تكبر وتدخل لعالم العشرينات، تبدا تشوف الدنيا بعين مختلفة. ما تبقاش تشوفها بالنية اللي كنت عليها فـ 18 سنة، وين كنت تحب تكون مثالي، تسمع الكلام، وضميرك يأنبك على أقل حاجة. مع الوقت، تتبدل كل حاجة. تبدا تولي تهتم براحتك النفسية والجسدية، وتفهم بلي الحياة ماشي وردية، والناس مش دايمًا نقيّة. تنهض، وتطيح، وتبكي، ويمكن ما تلقاش حتى لمن تشكي، وتحبس الكلام فـ قلبك، وتخلي سرك بينك وبين ربي، لأنه هو الوحيد اللي يسمعك ويعلم واش في داخلك. تولي تشوف الناس على حقيقتهم، حتى اللي من عيلتك. تلقى ناس تبدّل وجهها، اللي يحسد، اللي يغير، واللي يحاول يشوه صورتك بدون سبب. كاين ناس تحب تتحكم في حياتك، في اختياراتك، في قراراتك، ويمكن حتى في زواجك. وهنا لازم توقف، لازم تفهم بلي حياتك الخاصة ملكك، وممنوع أي واحد يدخل فيها. إذا عجبك تخصص، روح قراه. إذا حبيت تلبس حاجة، شريها. إذا حرت، صلي استخارة. متبقاش تجمع آراء الناس، لأن كل ما زاد عددهم، كل ما ضاعت شخصيتك في وسطهم. الناس اللي تحب ترضيلهم اليوم، غدوة يشوفوك ضعيف ويتحكموا فيك، وحتى حياتك الزوجية ما تسلمش منهم. مشاكلك، اختياراتك، أسرارك، خليهُم بينك وبين شريك حياتك، وبينك وبين ربي. ماشي لازم تفسر كل حاجة، وماشي كل شخص يستاهل يسمع همومك. ابكي، اضحك، زعق، عيش، تعلم، وواجه الحياة كيف ما جات. كل واحد ربي عطاه معركة باش يتعلم منها، وماشي كل تجربة تتقاسم. ركّز على نفسك، صلح من روحك، وخلّي الوقت يمشي بيك لقدّام. ما تضيعش وقتك في الناس اللي تحسد وتكره وتتكلم، لأنهم ما يزيدوك والو غير التعب. طيبة القلب والنية ماشي عيب، بصح في وقتها وبلاصتها. ما تخليش الحشمة الزايدة توقفك، راك كبير وتقدر تتحمل مسؤوليتك. واللي فعلاً يتمناك بخير، هما والديك، برك. غيرهم، اليوم يدعيلك، وغدوة يحسدك إذا وليت خير منهم. خليك واقف، خليك قوي، وعيش حياتك كيما تحب، مش كيما الناس تحب