كيد الرجال.. ماشي غير النسا اللي تكيد ديما نقولو "كيد النسا عظيم"، بصح رانا ننسو بلي كاين رجال ماشي ساهلين، يخدموها بالهدرة والمكر والتمثيل!
القاضي يحكي ويقول:
تزوجت مرة ثانية خفية على مرتي الأولى، ومارانيش قايلها والو... بصح هي فطنت! بدات تشك، كل مرة تفتح معايا الموضوع، نكذب عليها ونقوللها:
"راه غير الشيطان اللي يلعبلك فراسك!"
ومع الوقت، بدات تبكي وتشكي، وأنا نكذّب ونقسم ونعيش الدور...
حتى قررت أنا ومرتي الثانية نديرو خطّة باش نقنع الأولى وتحبس تشك.
وش دارو؟
جاءت الثانية للدار وقت صلاة الظهر، وقالت للأولى:
"جاية نشوف الشيخ نستشيرو فحاجة".
قالتلها الأولى:
"استنايه، راهو رايح يصلي ويرجع".
رجعت أنا من الصلاة، دخلت للصالون مع الأولى، وبدات الثانية "تمثّل" قدامي:
"أنا عندي راجلي نحبو ويحبني، بصح وليت نشك فيه راهو تزوج عليّا، وهو يقولي راه غير تخمام وشيطان..."
نا هنا لبست دور الشيخ!
وقلتلها:
🗣 "يا بنتي، راه غير وسوسة، والشيطان ما يخليش دار تهنا، شوفي مرتي الأولى! راهي مسكينة حتى هي الشك عشش فراسها، وأنا كل مرة نثبتلها ونقسم، بصح الشيطان يرجعلها بالهوس".
وهنا قلت قدامهم كامل:
"إذا كنت مزوّج مرا خارج هاذ الغرفة... راهي طالق!"
مرتي الأولى نهارت! طاحت تبكي، وتبوسلي ركابي وتقول:
"سامحني! الشيطان دارها فيا، والله ما نزيد نشك فيك يا راجلي العزيز".
العبرة: ماشي غير النساء اللي عندهم الكيد، كاين رجال يخدموها بنية وشوية تمثيل، يخلوك تشك في روحك انت
كيد الرجال؟ راهو فن بحد ذاتو
واش رايكم فالقصة؟
اكتبلنا في التعليقات، وبارطاجيها مع صحابك يضحكو شوية